काठमाडौं । सिंहदरबार परिसरभित्र अस्थायी टहरामा सञ्चालन भइरहेका चमेना गृह हटाउने प्रक्रिया सुरु गरिएको छ। प्रधानमन्त्री तथा मन्त्रिपरिषद्को कार्यालयको पहलपछि संघीय सचिवालय निर्माण तथा व्यवस्थापन कार्यालयले विभिन्न मन्त्रालय तथा संसदीय दलका कार्यालयलाई चमेना गृह बन्द गर्न निर्देशन दिएको हो।

गृह, परराष्ट्र, ऊर्जा, जलस्रोत तथा सिँचाइ, भौतिक पूर्वाधार तथा यातायात, संस्कृति, पर्यटन तथा नागरिक उड्डयन तथा सञ्चार तथा सूचना प्रविधि मन्त्रालय परिसरमा रहेका चमेना गृहहरूलाई जेठ २७ गतेभित्र हटाइसक्न भनिएको छ। यसअघि २०७५ सालमै यस्ता संरचना हटाउने निर्णय भए पनि कार्यान्वयन हुन सकेको थिएन।

यसैबीच, नेपाली कांग्रेस र नेकपा एमाले संसदीय दल कार्यालय परिसरमा रहेका चमेना गृह पनि हटाइने भएका छन्। संघीय संसद् सचिवालयले दुवै दललाई १५ दिनभित्र चमेना गृह हटाउन पत्राचार गरेको छ।