गुल्मी । गुल्मीमा आइतबार भएका दुई छुट्टाछुट्टै घटनामा एक महिला सर्पदंशबाट घाइते भएकी छन् भने एक बालकको खोलामा डुबेर मृत्यु भएको छ।

जिल्ला प्रहरी कार्यालय गुल्मीका अनुसार धुर्कोट गाउँपालिका–१ नयाँगाउँ निवासी २५ वर्षीया सिता वि.क. जंगलमा घाँस काट्ने क्रममा हरियो प्रजातिको सर्पले टोकेपछि घाइते भएकी हुन्। उनलाई प्रारम्भिक उपचारका लागि जिल्ला अस्पताल अर्घाखाँची लगिएको थियो।

अस्पतालमा सामान्य उपचारपछि थप उपचारका लागि कपिलवस्तुको गोरुसिङ्गेस्थित सर्पदंश उपचार केन्द्रमा रिफर गरिएको प्रहरीले जनाएको छ। हाल उनको अवस्था मध्यम रहेको बताइएको छ।

यता, मुसिकोट नगरपालिका–३ टेगा निवासी ११ वर्षीय लुकबहादुर गन्धर्वको खोलामा डुबेर ज्यान गएको छ। प्रहरीका अनुसार लसाहस्थित छल्दी खोलामा पौडी खेल्ने क्रममा उनी आइतबार दिउँसो करिब १२:१५ बजे अचानक डुबेका थिए।

घटनाको जानकारी प्राप्त हुनासाथ प्रहरी टोली घटनास्थल पुगेको थियो। घटनाबारे थप अनुसन्धानका लागि जिल्ला प्रहरी कार्यालय गुल्मीबाट थप प्रहरी परिचालन गरिएको जनाइएको छ।