काठमाडौं, असार ४ — देशका विभिन्न स्थानमा बिहीबार दिउँसो मेघगर्जनसहित वर्षा भइरहेको छ। मौसम पूर्वानुमान महाशाखाका अनुसार दिउँसो १२ः५० बजेसम्म ललितपुर, चितवन, परासी र धनकुटालगायत क्षेत्रमा पानी परेको छ भने आसपासका जिल्लामा पनि वर्षाको सम्भावना कायम रहेको छ।

महाशाखाले सार्वजनिक गरेको विवरणअनुसार पछिल्लो एक घण्टामा सबैभन्दा धेरै वर्षा काभ्रेको खोपासीमा मापन गरिएको छ। त्यहाँ २५.८ मिलिमिटर वर्षा भएको रेकर्ड गरिएको छ।

मौसमविद्हरूका अनुसार हाल नेपालको मौसम प्रणालीमा उपल्लो वायुमण्डलमा सक्रिय रहेको पश्चिमी न्यूनचापीय रेखा तथा स्थानीय वायुको संयुक्त प्रभाव देखिएको छ। यही कारण देशका विभिन्न भागमा बादल विकास भई मेघगर्जनसहित वर्षा भइरहेको महाशाखाले जनाएको छ।

महाशाखाले वर्षा भइरहेका तथा सम्भावित प्रभावित क्षेत्रका बासिन्दालाई आवश्यक सतर्कता अपनाउन आग्रह गरेको छ।