लुम्बिनी प्रदेश सरकारले आगामी आर्थिक वर्ष २०८३/०८४ का लागि तयार गरेको बजेट आज प्रदेश सभामा प्रस्तुत गर्ने भएको छ। प्रदेश सभाको आठौँ अधिवेशनअन्तर्गत हुने नवौँ बैठकमा साँझ ५ बजे आर्थिक मामिला तथा योजना मन्त्री धनेन्द्र कार्की ले बजेट पेश गर्ने कार्यसूची रहेको छ।

प्रदेश सरकारले यस वर्ष पनि अघिल्लो वर्षकै आकारको बजेट ल्याउने तयारी गरेको जनाएको छ। चालु आर्थिक वर्ष २०८२/०८३ मा ३८ अर्ब ९१ करोड रुपैयाँको बजेट ल्याइएको थियो भने आगामी वर्षका लागि करिब ३८ अर्ब रुपैयाँ आसपासको बजेट सार्वजनिक हुने अपेक्षा गरिएको छ।

सीमित वित्तीय स्रोत, बढ्दो दायित्व र अधुरा विकास आयोजनालाई ध्यानमा राख्दै सरकारले दायित्व भुक्तानी, प्रदेश गौरवका आयोजना, बहुवर्षीय योजना तथा क्रमागत कार्यक्रमलाई प्राथमिकतामा राखेर बजेट निर्माण गरेको बताइएको छ।

सरकारले आगामी बजेटलाई उत्पादन वृद्धि, रोजगारी सिर्जना, पूर्वाधार विस्तार, सुशासन प्रवर्द्धन तथा सामाजिक न्यायको लक्ष्यसँग जोडेको छ। विशेषगरी कृषि क्षेत्रको आधुनिकीकरण, सिँचाइ सुविधा विस्तार, जैविक खेती प्रवर्द्धन, स्थानीय तथा रैथाने बाली संरक्षण, कृषि उपजको ब्रान्डिङ तथा मूल्य शृङ्खला विकासलाई मुख्य प्राथमिकतामा राखिएको छ।

कृषि उत्पादन बढाएर आयातमा निर्भरता घटाउने र निर्यात प्रवर्द्धन गर्ने नीति पनि बजेटका प्रमुख एजेन्डामध्ये एक हुने सरकारको तयारी छ। बजेटमार्फत आर्थिक गतिविधि विस्तार गर्दै प्रदेशको समग्र विकासलाई गति दिने अपेक्षा गरिएको छ।