काठमाडौं । पञ्चकन्या माई हाइड्रोपावर लिमिटेडद्वारा प्रवर्द्धित ९.९८ मेगावाट क्षमताको अप्पर माई जलविद्युत आयोजनाबाट विद्युत उत्पादन पुनः सुचारु भएको छ।

गत वैशाख ७ गते दिउँसो ३ बजे आयोजनाको टनेल आउटलेटमा रहेको मेन होल आकस्मिक रूपमा फुटेपछि आयोजनाबाट हुने विद्युत उत्पादन पूर्ण रूपमा ठप्प भएको थियो। कम्पनीका अनुसार, क्षति पुगेको संरचनाको मर्मत सम्भार र आवश्यक प्राविधिक परीक्षण सम्पन्न गरी जेठ ७ गते बिहान १० बजेदेखि आयोजनालाई पुनः नियमित सञ्चालनमा ल्याइएको हो।

कम्पनीले सार्वजनिक गरेको चालू आर्थिक वर्षको तेस्रो त्रैमाससम्मको वित्तीय विवरण अनुसार, यस आयोजनाबाट मात्रै हालसम्म २९ करोड १६ लाख रुपैयाँभन्दा बढीको विद्युत बिक्री भइसकेको छ। प्राविधिक क्षतिका कारण करिब एक महिना बन्द रहे पनि आयोजना सञ्चालनमा आएसँगै कम्पनीको विद्युत बिक्री आम्दानी पुनः निरन्तर हुने भएको छ।